མགྱོགས་མྱུར་ངང“ཕྱུགས་སྐྱུར་བརླན་སྐྱོང”གི་སྐྱེ་ཁམས་ཁ་གསབ་ཀྱི་རྒྱུན་ཕན་ལམ་སྲོལ་འཛུགས་དགོས།

 ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་བའི་ལོ་འགའི་རིང་། མཚོ་སྔོན་པོའི་མཚོ་ངོས་རྒྱ་ཁྱོན་དང་བརླན་སའི་རྒྱ་ཁྱོན་ཇེ་ཆེར་སོང་ནས་མཚོ་སྔོན་པོའི་སྐྱེ་ཁམས་ཁོར་ཡུག་ཇེ་ལེགས་སུ་སོང་ཡོད།ཡིན་ནའང་སྐྱེ་ཁམས་ཁོར་ཡུག་ཇེ་ལེགས་སུ་འགྲོ་བཞིན་པར་ཚད་ལྡན་གྱི་ཚད་གཞི་འཇལ་བྱེད་ཅིག་དང་།དེ་བསྟུན་གྱི་ཁ་གསབ་དང་བྱ་དགའི་མ་ལག་ཅིག་ཀྱང་མེད། སྐྱེ་ཁམས་ཁོར་ཡུག་ལེགས་བཅོས་ལ་བྱས་རྗེས་བཞག་པའི་ས་གནས་ཀྱི་མང་ཚོགས་ལ་འོས་འཚམ་གྱི་ཁ་གསབ་རོགས་དངུལ་གཏེར་དགོས། རྒྱལ་ཡོངས་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་གཉིས་པར་ཞུགས་པའི་མཚོ་སྔོན་དུ་སྡོད་པའི་རྒྱལ་ཡོངས་སྲིད་གྲོས་ཨུ་ཡོན་རིན་ཆེན་རྒྱལ་གྱིས་མགྱོགས་མྱུར་ངང་མཚོ་སྔོན་པོའི“ཕྱུགས་སྐྱུར་བརླན་སྐྱོང”གི་སྐྱེ་ཁམས་ཁ་གསབ་མ་ལག་འཛུགས་དགོས་པའི་གྲོས་གཞི་བཏོན། 

གྲོས་གཞིའི་ཁྲོད་བཤད་རྒྱུར། མིག་སྔའི་བར་དུ། མཚོ་སྔོན་པོའི་མཚོ་ངོས་ཀྱི་རྒྱ་ཁྱོན་ལ་སྤྱི་ལེ་གྲུབ་བཞི་མ4516.23ཡོད་ཅིང་། ན་ནིང་གི་དུས་མཉམ་ལས་སྤྱི་ལེ་གྲུ་བཞི་མ80.54ཡར་འཕར་བ་དང་། ལོ་སྔོན་མ་དག་གི་དུས་མཉམ་གྱི་ཆ་སྙོམས་དང་བསྡུར་ན་སྤྱི་ལེ་གྲུ་བཞི་མ174.27ཡར་འཕར་ཡོད། དེ་ནི་ལོ་ངོ18རིང་གི་འཕར་ཚད་ཆེས་ཆེ་བ་ཡིན། མཚོ་སྔོན་པོའི་རྒྱ་ཁྱོན་བསྟུད་མར་ཇེ་ཆེར་སོང་བ་དང་བརླན་སའི་གཞི་རྒྱ་མུ་མཐུད་ནས་ཇེ་ཆེར་སོང་བ་དེས་མཚོ་སྔོན་པོའི་སྤྱིའི་སྐྱེ་ཁམས་ནུས་པ་དང་སྐྱེ་ཁམས་དགེ་མཚན་མངོན་གསལ་གྱི་ཇེ་ལེགས་སུ་སོང་བ་དང་། མཚོ་སྔོན་པོ་ས་ཁུལ་གྱི་སྐྱེ་ཁམས་ཁོར་ཡུག་ཇེ་ལེགས་སུ་བཏང་ཡོད། བརླན་ས་དང་མཚོ་ངོས་ཀྱི་རྒྱ་ཁྱོན་ཇེ་ཆེར་སོང་བའི་རྐྱེན་གྱིས་སྐྱེ་ཁམས་ཁོར་ཡུག་བསྟུད་མར་ཇེ་ལེགས་སུ་འགྲོ་བཞིན་ཡོད་མོད། ཡིན་ནའང་ས་གནས་ཀྱི་རྩྭ་སའི་རྒྱ་ཁྱོན་ཇེ་ཉུང་དུ་འགྲོ་བཞིན་ཡོད་པས་ཤུགས་རྐྱེན་དེ་རིགས་ནི་ཡུན་རིང་དང་རྒྱུན་མཐུད་ཀྱི་ཤུགས་རྐྱེན་ཞིག་རེད།

རིན་ཆེན་རྒྱལ་གྱིས་བཤད་རྒྱུར། འཛམ་གླིང་ཧྲིལ་བོའི་གནམ་གཤིས་འགྱུར་ལྡོག་གི་རྒྱབ་ལྗོངས་འོག བརླན་སའི་གཞི་རྒྱ་ཇེ་ཆེར་འགྲོ་བཞིན་པ་ནི་མཚོ་བོད་མཐོ་སྒང་གི་མཚོ་དང་མཚེའུ། འདམ་ར་དང་བརླན་སའི་ཁྲོད་རྒྱུན་ལྡན་གྱི་སྣང་ཚུལ་ཞིག་ཏུ་གྱུར་ཡོད། དེར་བརྟེན། མཚོ་བོད་མཐོ་སྒང་གི་སྐམ་སའི་དབུས་ཁུལ་གྱི་མཚེའུ་ལ་ཆེད་དོན་བརྟག་དཔྱད་བྱས་ཏེ། གནས་ཚུལ་དངོས་ལ་རྒྱུས་ལོན་གསལ་བོ་བྱེད་དགོས་པ་མ་ཟད། གནད་དོན་འདི་རིགས“ཕྱུགས་སྐྱུར་བརླན་སྐྱོང་དང་རྨོ་སྐྱུར་བརླན་སྐྱོང”གི་སྐྱེ་ཁམས་ཁ་གསབ་མ་ལག་ཏུ་ཚུད་པར་བྱས་ཏེ། སྐྱེ་ཁམས་ཁ་གསབ་དང་རྒྱུན་མཐུད་ཀྱི་བྱ་དགའི་གྱི་ལམ་ལུགས་འཛུགས་དགོས་བའི་གྲོས་གཞི་བཏོན། །

རྩོམ་སྒྲིག་པ། གངས་ཆབ།

དཔྱད་མཆན 0 ཡོད།