མཚོ་སྔོན་འཐུས་ཚབ་ཚོགས་པས་གཙང་གསུམ་འབྱུང་ཡུལ་སྐྱེ་ཁམས་སྲུང་སྐྱོབ་དང་འཛུགས་སྐྲུན་གྱི་དུས་རིམ་གསུམ་པའི་བྱ་བར་འཆར་འགོད་དང་བཀོད་སྒྲིག་གནང་དགོས་པའི་བསམ་ཚུལ་བཏོན།

ཀྲུང་གོ་བོད་ཀྱི་དྲ་བའི་འཕྲིན།  རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གཉིས་པར་ཞུགས་པའི་མཚོ་སྔོན་འཐུས་ཚབ་ཚོགས་པས་གཙང་གསུམ་འབྱུང་ཡུལ་སྐྱེ་ཁམས་སྲུང་སྐྱོབ་དང་འཛུགས་སྐྲུན་གྱི་དུས་རིམ་གསུམ་པའི་བྱ་བར་འཆར་འགོད་དང་བཀོད་སྒྲིག་གནང་དགོས་པའི་བསམ་ཚུལ་བཏོན། 

བསམ་ཚུལ་ནང་དབྱེ་ཞིབ་བྱས་པ་ལྟར་ན། 2005ལོར་གཙང་གསུམ་འབྱུང་ཡུལ་སྐྱེ་ཁམས་སྲུང་སྐྱོབ་དང་འཛུགས་སྐྲུན་གྱི་དུས་རིམ་དང་པོའི་བཟོ་བཀོད་དངོས་འབེབས་བྱས་ཤིང་།  ལོ་ངོ13རིང་གི་རྒྱུན་འཁྱོངས་ལྷོད་མེད་བྱས་པ་བརྒྱུད། གཙང་གསུམ་འབྱུང་ཡུལ་ས་ཁུལ་གྱི་སྐྱེ་ཁམས་མ་ལག་ཉམས་དམས་སུ་འགྲོ་བའི་རྣམ་པར་ཐོག་མའི་བཀག་འགོག་ཐེབས་ཏེ་སྐྱེ་ཁམས་འཛུགས་སྐྲུན་བཟོ་བཀོད་ས་ཁུལ་གྱི་སྐྱེ་ཁམས་ཁོར་ཡུག་མངོན་གསལ་གྱི་ལེགས་བཅོས་བྱུང་ཡོད། ཡིན་ནའང་། གཙང་གསུམ་འབྱུང་ཡུལ་ས་ཁུལ་གྱི་གཞི་རྒྱ་ཆེ་ཞིང་ཁོར་ཡུག་རྙོག་དྲ་ཡིན་པ། གནམ་གཤིས་སྡུག་ཆགས་ཡིན་པ་བཅས་ཀྱིས་ས་དེར་སྐྱེ་ཁམས་སྲུང་སྐྱོབ་དང་འཛུགས་སྐྲུན་བྱ་རྒྱུ་ནི་དུས་ཡུན་རིང་ཞིང་རྙོག་འཛིང་ལྡན་ལ། མ་ལག་ཅན་གྱི་བྱ་བ་ཞིག་ཏུ་ཆགས་ཡོད་སྟབས། མིག་སྔར་གཙང་གསུམ་འབྱུང་ཡུལ་ས་ཁུལ་གྱི་སྐྱེ་ཁམས་སྲུང་སྐྱོབ་དང་འཛུགས་སྐྲུན་ཁྲོད་ད་དུང་གནད་དོན་དང་དཀའ་ཁག་མི་ཉུང་བ་གནས་ཡོད། 

སྔར་ལས་ལྷག་པར་གཙང་གསུམ་འབྱུང་ཡུལ་ས་ཁུལ་གྱི་སྐྱེ་ཁམས་སྲུང་སྐྱོབ་དང་འཛུགས་སྐྲུན་བྱ་བར་སྐུལ་འདེད་གཏོང་ཆེད། མཚོ་སྔོན་ཞིང་ཆེན་གྱིས་སྔ་མོ་ནས《གཙང་གསུམ་འབྱུང་ཡུལ་གྱི་སྐྱེ་ཁམས་བདེ་འཇགས་རྣམ་པ་གསར་འཛུགས་བྱེད་པའི་སྐོར་གྱི་ཞིབ་འཇུག》དང《གཙང་གསུམ་འབྱུང་ཡུལ་གྱི་སྐྱེ་ཁམས་ཁོར་ཡུག་སྲུང་སྐྱོབ་དང་ལྗང་མདོག་འཕེལ་རྒྱས་ཀྱི་དམིགས་འབེན་མ་ལག་ཞིབ་འཇུག》། 《གཙང་གསུམ་འབྱུང་ཡུལ་གྱི་སྐྱེ་ཁམས་སྲུང་སྐྱོབ་དང་འཛུགས་སྐྲུན་གྱི་དུས་རིམ་གསུམ་པའི་བཟོ་བཀོད་འཆར་འགོད་ཀྱི་འགན་འཁྲི་གཙོ་བོ་དང་བྱེད་ཐབས་གལ་ཆེན་ཞིབ་འཇུག》།《གཙང་གསུམ་འབྱུང་ཡུལ་ས་ཁུལ་གྱི་སྐྱེ་ཁམས་དཔལ་ཡོན་འཛུགས་སྐྲུན་འཐུས་ཚང་དུ་གཏོང་བའི་སྒྲིག་སྲོལ་ལམ་ལུགས་ཞིབ་འཇུག》བཅས་དུས་སྐབས་སྔོན་མའི་ཞིབ་འཇུག་གི་བྱ་བ་སྣ་བཞི་སྒྲུབ་ཞིང་། རྗེས་མར་དེ་སྔོན་གྱི་ཞིབ་འཇུག་གི་གྲུབ་འབྲས་ལ་གཞིགས་ནས་འཆར་འགོད་དང་སྒྲིག་བཀོད་བྱ་རྩིས་ཡོད་པ་རེད། 

དེར་བརྟེན། འཐུས་མི་ཚོགས་པས་འཆར་འགོད་སྒྲིག་བཀོད་བྱེད་པའི་བྱ་བའི་གོ་རིམ་ཁྲོད། རྒྱལ་ཁབ་ཀྱིས་ཕྱོགས་གཅིག་ནས་གཙང་གསུམ་འབྱུང་ཡུལ་ས་ཁུལ་གྱི་སྐྱེ་ཁམས་འཛུགས་སྐྲུན་ལ་དོ་སྣང་དང་རྒྱབ་སྐྱོར་བྱེད་ཤུགས་ཆེ་རུ་བཏང་སྟེ། དུས་རིམ་གཉིས་པ་དང་དུས་རིམ་གསུམ་པའི་འཆར་འགོད་ལ་འབྲེལ་མཐུད་བྱེད་པར་སྐུལ་འདེད་བྱ་དགོས་པ་དང་། ཕྱོགས་གཞན་ཞིག་ནས་མཚོ་སྔོན་གྱིས་རྒྱལ་ཁབ་སྤྱི་གླིང་བསྐྲུན་རྒྱུ་གཙོ་བོར་བཟུང་སྟེ། རང་བྱུང་སྲུང་སྐྱོབ་ཁུལ་རྨང་གཞི་ཡིན་པ་དང་། རིགས་མི་འདྲ་བའི་རང་བྱུང་སྤྱི་གླིང་སོ་སོ་ཁ་གསབ་ཡིན་པའི་རང་བྱུང་སྲུང་སྐྱོབ་ས་ཁུལ་གྱི་དོ་དམ་མ་ལག་གཞུང་ལུགས་དང་ལག་ལེན་ཕྱོགས་ཀྱི་མཛུབ་སྟོན་གསར་འཛུགས་བྱེད་པར་ཤུགས་སྣོན་དགོས་པའི་བསམ་ཚུལ་བཏོན་པ་རེད། །

རྩོམ་སྒྲིག་པ། མཁའ་འགྲོ་ཚེ་བརྟན།

དཔྱད་མཆན 0 ཡོད།