བོད་ཀྱི་གནའ་བོའི་ཐེར་མའི་བཟོ་སྟངས།

རྩེད་ཐེར་ལ་ཐེར་མ་སོགས་མིང་གི་རྣམ་གྲངས་ཧ་ཅང་མང་ལ། དེ་ནི་བོད་ཀྱི་དམངས་ཁྲོད་ལག་རྩལ་ལས་ཐོན་པའི་རྒྱུ་ཆ་བལ་ཅན་གྱི་སྤུས་དག་ཐོན་རྫས་ཤིག་ཡིན་པ་དང་། བོད་རང་སྐྱོང་ལྗོངས་ལྷོ་ཁ་ས་ཁུལ་གྱི་སྣེ་གདོང་རྫོང་རྩེད་ཐང་གྲོང་རྡལ་གྱི་རྒྱུ་བལ་ལས་གྲུབ་པའི་སྤུས་དག་ལག་བཟོས་འཁལ་འཐག་ཉག་གཅིག་ཡིན། རྩེད་ནི་རྩེད་ཐང་དང་ཐེར་ནི་བོད་ཀྱི་ཐེར་མ་ལ་གོ་ཞིང་བསྡུས་མིང་ལ་རྩེད་ཐེར་ཞེས་འབོད། རྩེད་ཐེར་ནི་བོད་ཀྱི་སྣམ་བུའི་ཁྲོད་ཀྱི་རྩེ་གྲས་ཡིན་ལ། དེར་འཇམ་ཞིང་མཉེན་པ། རི་མོ་གསལ་བ། སྲ་མཐུག་མཉམ་པ། དགུན་དྲོ་ཞིང་དབྱར་བསིལ་བ། འཛད་མཐའ་མེད་པ་སོགས་ཐུན་མོང་མ་ཡིན་པའི་ཁྱད་ཆོས་ཀྱིས་ཀུན་ནས་ཕྱུག་པར་མ་ཟད། དེ་བཟོ་དཀའ་བ་དང་རྒྱུ་ཆ་འདེམས་སྐབས་ཞིབ་ཚགས་ཡིན་དགོས་པ། བཟོ་རྩལ་རྙོག་འཛིང་ལྡན་པ་སོགས་ཀྱིས་སྔོན་ཆད་འབྱོར་ཕྱུག་དབང་ཐང་དར་བའི་མིས་མ་གཏོགས་གྱོན་ཐུབ་མེད། ད་ལྟ་དེའི་རིགས་ཀྱི་ཐོན་རྫས་ལ་སྐེ་དཀྲིས་དང་། གཡང་ཤོམ། བོད་ལྭ། ཐང་ག་སོགས་ཡོད་ཅིང་རྣ་ཐོས་སུ་རྩེད་ཐང་གི་སྐེ་དཀྲིས་གཅིག་གི་རིན་གོང་སྒོར་ཉིས་སྟོང་དང་བོད་ལྭར་སྒོར་ཆིག་ཁྲི་ཡན་ཡིན་པར་བཤད།

རྒྱུ་ཆ་འདེམས་པ། རྩེད་ཐེར་གྱི་རྒྱུ་ཆ་འདེམས་པར་ཧ་ཅང་ཞིབ་ཚགས་ལྡན་ཞིང་། ལུག་གི་སྐེ་ཡི་བལ་ཡིན་དགོས་ཏེ། སྐེའི་བལ་ལ་ཉག་ཕྲ་ཞིང་རིང་བ། ལུས་ལ་འཇམ་པ་སོགས་ཀྱི་ཁྱད་ཆོས་ལྡན། སྐེ་དཀྲིས་གཅིག་བཟོ་བར་མ་མཐའ་ཡང་ལུག་ཉི་ཤུའི་སྐེའི་བལ་དགོས། དེ་བས་ཀྱང་དེ་བཟོ་བར་རིམ་པ18བརྒྱུད་དགོས་ཤིང་། སྤུས་དག་རྒྱུ་ཆ་བཅུ་ལྷག་དགོས་ལ་དེའི་ནང་གུར་ཀུམ་སོགས་སྨན་རྩ་ཆེན་ཡང་འདུ། དེ་དག་རྒྱུ་སྤུན་གཉིས་ཡང་དང་བསྐྱར་དུ་འཐག་པས་ད་གཟོད་ཐོན་རྫས་གཅིག་གྲུབ་པ་ཡིན་ལ། བཟོ་རྩལ་ལ་ཧ་ཅང་བྱང་ཆ་ལྡན་པའི་བཟོ་པ་ཞིག་གིས་དེ་ལྟར་ཉིན་གཅིག་ལ་ལི་སྨི20ལྷག་དང་། ཆ་ཚང་ཞིག་བཟོ་བར་ཟླ་ཕྱེད་ལྷག་འགོར།

རྙོག་འཛིང་གི་བཟོ་རྩལ། རྩེད་ཐེར་གྱི་བཟོ་རྩལ་ཧ་ཅང་རྙོག་འཛིང་ལྡན་ཞིང་མ་རྒྱུ་གཙང་མར་བཀྲུས་རྗེས། དེ་ལས་སྙིགས་རོ་ལྟ་བུའི་མི་མཁོ་བ་རྣམས་དོར་དགོས་ཤིང་། དེ་མུར་བལ་སེལ་ཏེ་ཐོན་རྫས་ཀྱི་དགོས་མཁོ་ལྟར་ཤིང་ལས་བཟོས་པའི་འཐག་ཁྲིའི་སྟེང་རྒྱུ་དང་སྤུན་བསྣོལ་ཏེ་བཟོ་དགོས། གལ་ཏེ་སྐེ་དཀྲིས་སོགས་བཟོ་དགོས་ཚེ་རྒྱུ་དང་སྤུན་ལ་སྦོམ་ཕྲ་མེད་པ་ཡིན་དགོས་ལ། དེར་བལ་རྒྱ་མ་གང་གིས་རྒྱུ་དང་སྤུན་གྱི་སྐུད་པ20000Mདགོས་པ་སོགས་ཐོན་རྫས་མི་འདྲ་བར་རྒྱུ་དང་སྤུན་གྱི་དགོས་མཁོ་ཡང་མི་འདྲ། དེ་མིན་རྩེད་ཐེར་ལག་བཟོས་བྱ་བར་རྒྱུ་དང་སྤུན་ཧ་ཅང་ཞིབ་ཚགས་ལྡན་དགོས་ཏེ། གོ་ཐོས་སུ་རྩེད་ཐེར་ལི་སྨི་གཅིག་བཟོ་བར་རྒྱུ་སྐུད720དང་སྤུན་སྐུད30དགོས་པར་སྨྲ། དེ་ཡང་འཐག་ཟིན་པའི་རྩེད་ཐེར་མེ་ཤུགས་ཆུང་བས་ཡང་དང་བསྐྱར་དུ་བསྲེགས་ནས་ངོས་འཇམ་པོར་བཟོ་དགོས་ཤིང་། དེ་རྗེས་ཚ་གྲང་ཏུའུ30ནས40བར་གྱི་ཆུའི་ནང་དུས་ཡུན་ཆུ་ཚོད་ལྔ་ནས་དྲུག་བར་སྦངས་རྗེས། ཆུ་གྲང་མོས་གཙང་མར་བཀྲུ་དགོས་པ་དང་། དེ་མུར་ཐེར་མ་སྒྲིལ་ཅིང་རྡོ་བས་ཉིན་གསུམ་ནས་བཞི་ལ་གནོན་དགོས། དེའི་རྗེས་ཚོན་བསྒྱུར་ཅིང་ཉར་ཚགས་བྱ་དགོས། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།